អភិបាលខេត្តតាកែវនឹងប្រើធម៌ក្តៅលើមេប៉ុស្តិ៍ និងអធិការគ្រប់ក្រុងស្រុក រឿងបង្រ្កាបគ្រឿងញៀនក្នុងមូលដ្ឋានខ្លួនមិនបាន

តាកែវ៖ឯកឧត្តម ឡាយ វណ្ណៈ អភិបាលខេត្តតាកែវ បានធ្វើការព្រមាន និងចាត់វិធានការណ៍ក្តៅដល់មេប៉ុស្តិ៍ និងអធិការនគរបាលក្រុង ស្រុក ទូទាំងខេត្តតាកែវ បើសិនជាមន្រ្តីនគរបាលខេត្ត ចុះមកបង្ក្រាបករណីជួញដូរ និងប្រើប្រាស់គ្រឿងញៀននៅមូលដ្ឋានរបស់ខ្លួន សូមចុះចេញ ពីតំណែងដោយខ្លួនឯងឲ្យអស់ទៅ ។

ការថ្លែងព្រមានធ្ងន់ៗបែបនេះ ធ្វើឡើងក្នុងខណៈពេលដែលឯកឧត្តម បានអញ្ជើញចូលរួមក្នុងពិធិ កាត់ឬសសីមា និងសមិទ្ធិផលនានាក្នុងវត្តបន្ទាយកោះជុំ ស្ថិតនៅឃុំព្រៃខ្លា ស្រុកកោះអណ្តែត ខេត្តតាកែវ នាព្រឹកថ្ងៃទី ១៨ កុម្ភៈ ២០១៧ ។

ឯកឧត្តម ឡាយ វណ្ណៈ មានប្រសាសន៍បន្តថា នៅពេលដែលប្រជាពលរដ្ឋមកប្តឹងកម្លាំងមានសមត្ថកិច្ចអំពីករណីជួញដូរ និងប្រើប្រាស់គ្រឿងញៀននៅមូលដ្ឋានរបស់ពួកគាត់ ហើយកម្លាំងមូលដ្ឋានដូចជាមេប៉ុស្តិ៍ និងអធិការស្រុកបង្រ្កាបមិនបាន ហើយកម្លាំងនគរបាលនៃស្នងការដ្ឋានខេត្ត ចុះមកបង្ក្រាបនៅប៉ុស្តិ៍២ដងនោះ សូមលោកមេប៉ុស្តិ៍លាលែងចេញពីតំណែង ដោយខ្លួនឯង ហើយអធិការនគរបាលក្រុង ស្រុកក៍ដូចគ្នាដែរ បើសិនជាកម្លាំងខេត្តចុះមកបង្ក្រាប៥ដង ឯកឧត្តមនឹងធ្វើសំណើទៅក្រសួងមហាផ្ទៃ ដើម្បីធ្វើការស្នើផ្លាស់ប្តូរអធិការនោះចោលភ្លាម ដោយមិនទុកនាំឲ្យ ប្រជាពលរដ្ឋគ្មានជំនឿលើកម្លាំងសមត្ថកិច្ចខេត្តតាកែវនោះឡើយ ។

ឯកឧត្តម ឡាយ វណ្ណៈ បន្ថែមទៀតថា ជាធម្មតានោះទេ ការផ្លាស់ប្តូរ និងការ តែងតាំងមន្រ្តីរាជការ ហើយចំពោះមន្រ្តីណាដែលអសកម្មចំពោះការងារ ជាពិសេស គឺបញ្ហាគ្រឿងញៀន ដែលរាជរដ្ឋាភិបាលកម្ពុជាបានដាក់ចេញផែនការប្រយុទ្ធប្រឆាំង គ្រឿងញៀនលើកទី១ យើងត្រូវតែបង្រ្កាបឲ្យខានតែបាន ដោយមិនត្រូវបណ្តែតបណ្តាយទុកយូរតទៅទៀតបានទេ ដូច្នោះសូមកម្លាំងសមត្ថកិច្ចគ្រប់ជាន់ថ្នាក់ ត្រូវតែធ្វើការបង្រ្កាប និងទទួលយកការសំណូមពរ ក៍ដូចជាពាក្យបណ្តឹងពីករណីគ្រឿងញៀន នេះហើយទប់ស្កាត់ និងបង្ក្រាបឲ្យមានប្រសិទ្ធិភាពខ្ពស់បំផុត ៕