ពលរដ្ឋក្រីជាង៥០គ្រូសារបានទទួលអំណោយពីព្រះចៅអធិការវត្តលាយបូរ

តាកែវ ៖ ក្រុមប្រជាពលរដ្ឋដែលមានជីវភាពក្រីក្រចំនួន៥៧គ្រូសារ ដែលរស់នៅក្នុងឃុំ លាយបូ ស្រុកត្រាំកក់ ខេត្តតាកែវ នៅព្រឹកថ្ងៃ សុក្រ ទី ៩ ខែ កញ្ញា ឆ្នាំ ២០១៦ នេះបានទទួលអំណោយនិងថវិកាមួយចំនួនពីព្រះចៅអធិការវត្តលាយបូ នៅក្នុងឱកាសបុណ្យចម្រើនព្រះជន្មរបស់ព្រះអង្គ។

នៅក្នុងឱកាសនោះ ព្រះភិក្ខុ ហ៊ិន ពីរ៉ាត់ ព្រះចៅអធិការវត្តលាយបូ បានមានសង្ឃដីការថា ក្នុងនាមព្រះអង្គជាអ្នកបួសក្រៅតែពីជួយលើកស្ទួយព្រះពុទ្ធសាសនាអោយកាន់តែមានការរីកចម្រើនឡើង ព្រះអង្គក៏មានតួនាទីចូលរួមកសាងសង្គមអោយកាន់តែថ្កុំថ្កើងផងដែរ ជាពិសេសជួយប្រជាពលរដ្ឋក្រីក្រ ដើម្បីធ្វើយ៉ាងណាអោយជីវភាពពួកគេកាន់តែមានភាពល្អប្រសើរឡើង។

ព្រះភិក្ខុ ហ៊ិន ពីរ៉ាត់ បានមានសង្ឃដីការបន្តថា សង្គមមួយដែលមានការរីកចម្រើនទាល់តែមានមេដឹកនាំល្អហើយក៏ត្រូវតែមានការចូលរួមពីវិស័យអាណាចក្រនិងវិស័យពុទ្ធចក្រផងដែរ។ អ្នកដឹកនាំប្រៀបដូចជាដើមឈើមួយដើមដែលមានមែកសាខាសម្រាប់ជាទីម្លប់របស់ប្រជាពលរដ្ឋ។ ដើម្បីអោយប្រជាពលរដ្ឋមានម្លប់សម្រប់ជ្រក យើងទាំងអស់គ្នាគួគម្បីថែរក្សាដើមឈើអោយបានល្អ ដោយមិនត្រូវកាប់ដើមឈើជិកឬសដើមឈើនោះអោយរលំនោះទេ ។

លោក ឆន ឈិន ប្រធានក្រុមប្រឹក្សាស្រុកត្រាំកក់ បានមានប្រសាសន៍ថា អំណោយ ទាំងនេះវាតិចតួច

មែន ប៉ុន្តែវាកើតចេញពីសទ្ធាជ្រះថ្លាពីព្រះទ័យរបស់ព្រះអង្គ ហ៊ិន ពីរ៉ាត់ ចៅអធិការវត្តលាយបូរ ក្នុងការចូលរួមសកម្មភាពមនុស្សធម៌ជាមួយនឹងអាជ្ញាធរ ហើយវាក៍បានដោះស្រាយនូវការលំបាករបស់បងប្អូនបានមួយគ្រាផងដែរ ។

លោក ឆន ឈិន បន្តថា ជាមួយនឹងការចូលរួមសកម្មភាពមនុស្សធម៌ ពីសំណាក់ព្រះអង្គ ហ៊ិន ពីរ៉ាត់ ក៍បង្ហាញឲ្យឃើញពីវិស័យពុទ្ធចក្រមិនត្រឹមតែជួយអប់រំផ្លូវចិត្តដល់ពុទ្ធបរិស័ទឲ្យប្រព្រឹត្តតែ អំពើល្អនោះទេ ប៉ុន្តែវិស័យពុទ្ធចក្រក៍ជួយនឹងជាមួយអាជ្ញាធរ រាជរដ្ឋាភិបាល ក្នុងការដោះស្រាយបញ្ហាទុក្ខលំបាក របស់ប្រជាពលរដ្ឋទីទាល់ក្រ ដោយមិនឲ្យប្រជាពលរដ្ឋណាម្នាក់ ស្លាប់ដោយសារតែអត់អាហារនោះឡើយ៕