ប្រជាពលរដ្ឋខេត្តតាកែវប្រមាណជាង៤ម៉ឺននាក់ស្ថិតក្នុងភាពជាអនក្ខរជន

តាកែវ ៖ មន្រ្តីជាន់ខ្ពស់មន្ទីរអប់រំយុវជន និងកីឡាខេត្តតាកែវបានថ្លែងឲ្យដឹងថា ក្នុងចំណោម ប្រជា ពលរដ្ឋខេត្តតាកែវប្រមាណ១លាន៣ម៉ឺននាក់ មានប្រជាពលរដ្ឋប្រមាណជាង ៤ម៉ឺននាក់ដែលមានអាយុពី១៥ ឆ្នាំ ដល់អាយុ៤៥ ឆ្នាំ ជាអនក្ខរជន។

ថ្លែងនៅក្នុងពិធីប្រារព្វទិវាអក្ខរកម្មជាតិ ដែលបានរៀបចំធ្វើឡើងនៅសាលាស្រុកអង្គបូរី នៅព្រឹកថ្ងៃ ៦ កញ្ញា ឆ្នាំ ២០១៦នេះ លោកស្រី សារី ផល្លី អនុប្រធានមន្ទីរអប់រំយុវជននិងកីឡាខេត្តតាកែវបានថ្លែងថា បច្ចុប្បន្នខេត្តតាកែវមានអនរក្ខជនចំនួន៤៤.៣៧៦នាក់ ក្នុងនោះស្រ្តីមានចំនួនជាង២ម៉ឺននាក់។ សព្វថ្ងៃថ្នាក់អក្ខរកម្មបានដំណើរការបង្រៀននៅតាមបណ្ដាលក្រុង ស្រុកមួយចំនួន ដែលមានថ្នាក់ចំនួន៥២ថ្នាក់ សិស្សអក្ខរកម្មចំនួនជាង៨រយនាក់និងមានគ្រូអក្ខរកម្មចំនួន៥២នាក់។

នៅក្នុងឱកាសនោះលោក អ៊ូច ភា អភិបាលរងខេត្តតាកែវបានថ្លែងថា រាជរដ្ឋាភិបាលកម្ពុជាមានការយកចឹត្តទុកដាក់ខ្ពស់ណាស់ពីបញ្ហាអក្ខរកម្មនេះ ដោយក្នុងនោះបានបង្កើនការចំណាយលើវិស័យអប់រំនិងបានបង្កើនថ្នាក់អក្ខរកម្មនៅទូទាំងប្រទេសថែមទៀតផង ហើយអក្ខរកម្មនេះ វានឹងធ្វើឲ្យប្រជាពលរដ្ឋ ឬកុមារ និងយុវជន ដែលជាអក្ខរជន បានសិក្សារៀនសូត្រ បើទោះបីជាមានអាយុច្រើន ឬបោះបង់ចោល ការសិក្សាក៍ដោយ ក៍អាចឲ្យពួកគាត់មានឱកាសសិក្សាឡើងវិញ ហើយមានចំណេះដឹងប្រកបដោយប្រសិទ្ធិភាព និងមាននិរន្តភាពនៃចំណេះដឹងផងដែរ ។

លោកអភិបាលរងខេត្តក៏បានធ្វើការអំពាវនាវ អោយអាជ្ញាធរភូមិឃុំនៅទូទាំងខេត្តតាកែវត្រូវតែជម្រុញប្រជាជននៅក្នុងមូលដ្ឋានរបស់ខ្លួនណាម្នាក់ដែលមិនចេះអក្ស អោយចូលមកសិក្សាថ្នាក់អក្ខរកម្មអោយបានគ្រប់ៗគ្នា។ ព្រោះភាពមិនចេះអក្សនិងនាំអោយប្រជាពលរដ្ឋខ្វះការពិចារណា ឆាប់ងាយចាញ់បោកគេ ជាពិសេសវាធ្វើឲ្យធ្លាក់ទៅក្នុងស្ថានភាពក្រីក្រផងដែរ ដោយសារតែភាពមិនចេះអក្សរ៕