អាជ្ញាធរខេត្តតាកែវ៖ ប្រារព្វទិវាអន្តរជាតិប្រយុទ្ធប្រឆាំងគ្រឿងញៀនក្រោមប្រធានបទ ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន

(តាកែវ) ៖ ទិវាអន្តរជាតិប្រយុទ្ធប្រឆាំងគ្រឿងញៀនក្រោមប្រធានបទ << ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន >> ត្រូវបានប្រារព្ធធ្វើក្រោមអធិបតីភាព ឯកឧត្តម អ៊ូច ភា អភិបាលខេត្តតាកែវ លោកជំទាវ ឈឹម សិទ្ធិបុណ្យរិទ្ធ អគ្គលេខាធិការរង នៃអាជ្ញាធរជាតិប្រយុទ្ធប្រឆាំងគ្រឿងញៀន ដោយមានការ អញ្ជើញចូលរួមពីប្រធានលេខាធិការដ្ឋានគណកម្មាធិការត្រួតពិនិត្រគ្រឿងញៀនខេត្ត ក្រុង ស្រុក កងកំលាំងបីប្រភេទ យុវជនកាយរិទ្ធ កាកបាទក្រហម លោកគ្រូ អ្នកគ្រូ ប្រជាពលរដ្ឋ សិស្ស និស្សិត និងអ្នកពាក់ព័ន្ធ ចំនួន៤១៤នាក់។កម្មវិធីនេះមានប្រារព្ធធ្វើនៅព្រឹក ថ្ងៃព្រហស្បតិ៍១៥រោជ ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ត្រូវនឹងថ្ងៃទី១២ ខែកក្កដា ឆ្នាំ២០១៨ នៅសាលមហោស្រពខេត្តតាកែវ។

ឯកឧត្តម អ៊ុន វណ្ណា អភិបាលរងប្រធានលេខាធិការដ្ឋានគណកម្មាធិការត្រួតពិនិត្យគ្រឿងញៀនខេត្ត បានថ្លែងស្វាគមន៍ និងរបាយការណ៍ពីការងារប្រយុទ្ធប្រឆាំងគ្រឿងញៀនដែលថ្នាក់ដឹកនាំនិងមន្រ្តីពាក់ព័ន្ធក្នុងខេត្តបានខិតខំរួមគ្នាអនុវត្តការងារយ៉ាងសកម្មនិងបានពង្រឹងកិច្ចសហប្រតិបត្តិការជាមួយប្រទេសជិតខាងទប់ស្កាត់បទល្មើសគ្រឿងញៀនឆ្លងដែន ។

លោកជំទាវ ឈឹម សិទ្ធិបុណ្យរិទ្ធអគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន បានអាននូវសាររបស់សម្តេចតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ថ្លែងអំណរព្រះគុណ និងអរគុណជាថ្មីម្តងទៀត ចំពោះសម្តេចព្រះមហាសង្ឃរាជទាំងពីរគណៈ ព្រះថេរានុត្ថេរៈគ្រប់ព្រះអង្គ ថ្នាក់ដឹកនាំ និងមន្រ្តីគ្រប់លំដាប់ ថ្នាក់នៃស្ថាប័នព្រឹទ្ធសភា រដ្ឋសភា កាកបាទក្រហមកម្ពុជា អាជ្ញាធរជាតិប្រយុទ្ធប្រឆាំងគ្រឿងញៀន ក្រសួង ស្ថាប័នពាក់ព័ន្ធ និងអង្គការមិនមែនរដ្ឋាភិបាលជាដៃគូជាតិ-អន្តរជាតិ វិស័យសាសនា វិស័យឯកជន សប្បុរសជន សិល្បករ សិល្បការនី ពិធីករ ពិធីការនី ម្ចាស់ជំនួយ និងបណ្តាប្រទេសជាមិត្ត ទាំងអស់ ដែល បានខិតខំប្រឹងប្រែងចូលរួម និងគាំទ្រយ៉ាងសកម្ម លើការងារប្រយុទ្ធប្រឆាំងគ្រឿងញៀន នាពេលកន្លងមក និងសូមឱ្យប្រពៃណីនៃការចូលរួមបន្តស្ថិតនៅ និងកាន់តែសកម្មថែមទៀត ដើម្បីជាឧត្តមប្រយោជន៍រួម គឺការ លើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋ ការពារថែរក្សាបាននូវ សន្តិភាព សន្តិសុខ សណ្តាប់ធ្នាប់ និងការអភិវឌ្ឍន៍ប្រទេសជាតិឱ្យរីកចម្រើនទៅមុខកាន់តែឆាប់រហ័ស។ចំណាប់អារម្មណ៍របស់តំណាងអង្គពិធីបានធ្វើការចាប់អារម្មណ៍និងប្តេជ្ញាចិត្តថា បញ្ហាគ្រឿងញៀនជាបញ្ហារួមរបស់យើងទាំងអស់ដូចនេះយើងត្រូវតែរួមគ្នាដោះស្រាយ ដើម្បីសហគមន៍មូលដ្ឋានយើងគ្មានគ្រឿងញៀន ។

ឯកឧត្តម អ៊ូច ភា អភិបាលប្រធានគណកម្មាធិការត្រួតពិនិត្យគ្រឿងញៀនខេត្តតាកែវ បានមានប្រសាសន៍ថា ដោយថ្លែងនូវការកើតសរសើរដោយស្មោះចំពោះថ្នាក់ដឹកនាំ អាជ្ញាធរមូលដ្ឋាន និងមន្រ្តីរាជការគ្រប់លំដាប់ ថ្នាក់ កងកម្លាំងប្រដាប់អាវុធគ្រប់ប្រភេទ នៅគ្រប់ស្ថាប័ន អង្គភាពរបស់ខេត្តទាំងអស់ ក៏ដូចជាបណ្តាអង្គការដៃគូ វិស័យសាសនា វិស័យឯកជន និងសប្បុរសជននានា ដែលបានចូលរួម និងគាំទ្រយ៉ាងសកម្មដល់ការងារប្រយុទ្ធប្រឆាំងគ្រឿងញៀនតាមតួនាទី និងភារកិច្ចរៀងៗខ្លួន ប្រកបដោយស្មារតីទទួលខុសត្រូវខ្ពស់ ក្នុងការបង្ការ និងទប់ស្កាត់រាល់បញ្ហាដែលមានការពាក់ព័ន្ធនឹងគ្រឿងញៀន ពិសេសក្នុងដំណើរការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទាំង ៣ ដំណាក់កាលរបស់រាជរដ្ឋាភិបាលដែលបាននិងកំពុងអនុវត្តស្របពាក្យស្លោក ចូលរួមទាំងអស់គ្នាដើម្បីជីវិត និងសហគមន៍យើងគ្មានគ្រឿង ញៀន ដ៏មានតម្លៃ និងមានសារៈសំខាន់៕