អាជ្ញាធរខេត្តតាកែវប្រាប់មេឃុំ ចៅសង្កាត់អោយចេញលិខិតបញ្ចាក់ទីលំនៅជូនប្រជាពលរដ្ឋសម្រាប់ចុះឈ្មោះឆ្នោតដោយមិនយកកម្រៃ

ខណៈពេលដែលការធ្វើអត្តសញ្ញាប័ណ្ណចែកជូនប្រជាពលរដ្ឋ នៅមានសេសសល់នៅឡើយហើយការបោះឆ្នោតក្រុមប្រិក្សាឃុំសង្កាត់កាន់តែខិជិតមកដល់នោះ នៅព្រឹកថ្ងៃអង្គារ៏ ទី ០២ ខែ សីហា ឆ្នាំ ២០១៦ នេះ អាជ្ញាធរខេត្តតាកែវបានធ្វើការជួបប្រជុំជាមួយមេឃុំ ចៅសង្កាត់ទាំង១រយ នៅក្នុងខេត្តតាកែវដើម្បីប្រាប់ពីការប្រកាសរបស់ក្រសួងមហាផ្ទៃ ពាក់ព័ន្ធទៅនិងការជម្រុញអោយធ្វើអត្តសញ្ញាណប័ណ្ណជូនប្រជាពលរដ្ឋនិងការបំពេញបែបបទដើម្បី ចេញលិខិតបញ្ជាក់អត្តសញ្ញាណនិងលិខិតស្នាក់នៅ ដើម្បីបម្រើអោយការចុះឈ្មោះបោះឆ្នោតនាពេលខាងមុខ ។

លោក ម៉ឹង វុទ្ធី នាយករដ្ឋបាលសាលាខេត្តតំណាងអោយ ឯកឧត្តមអភិបាលខេត្តតាកែវបានថ្លែងឲ្យដឹងថា កន្លងមកការធ្វើអត្តសញ្ញាណប័ណ្ណចែកជូនប្រជាពលរដ្ឋ នៅក្នុងខេត្តតាកែវសម្រេចបានលទ្ធផលប្រមាណជាង៨០ភាគរយហើយ នៅសល់ប្រមាណជាង១០ភាគរយទៀតភាគច្រើន ជាប្រជាពលរដ្ឋដែលធ្វើចំណាកស្រុក ដូច្នោះនៅពេលដែលពួកគាត់មកចុះឈ្មោះបោះឆ្នោត ក្រុមប្រឹក្សាឃុំសង្កាត់ខាងមុខ ពួកគាត់និងត្រូវរត់មកលោកមេឃុំចៅសង្កាត់ ដើម្បីបញ្ជាក់ពីទីលំនៅដើម្បីចុះឈ្មោះបោះឆ្នោត ជាក់ជាពុំខាន។ លោកមេឃុំចៅសង្កាត់ត្រូវតែប្រាប់គាត់ពីនិតិវិធី នៃការស្នើសុំនិងត្រូវចេញឯកសារបញ្ជាក់ទីលំនៅ ជូនពួកគាត់ដើម្បីចុះឈ្មោះបោះឆ្នោត ចំពោះពលរដ្ឋណាដែលគ្មានអត្តសញ្ញាណប័ណ្ណ។

លោក ម៉ឹង វុទ្ធី បានមានប្រសាសន៏បន្តថា ការចេញលិខិតបញ្ជាក់ទីលំនៅជូនប្រជាពលរដ្ឋដើម្បីទៅចុះឈ្មោះបោះឆ្នោតនេះគឺមេឃុំចៅសង្កាត់អាចចេញជូន ចំពោះតែប្រជាពលរដ្ឋនៅមូលដ្ឋានរបស់ខ្លួន និងត្រូវតែមានសាក្សីបញ្ជាក់ពីមូលដ្ឋានរបស់ខ្លួនតែប៉ុណ្ណោះ ម្យ៉ាងទៀតច្បាប់មិនតម្រូវអោយប្រជាពលរដ្ឋបង់កំរៃសេវានោះទេ ហើយបើមានមេឃុំចៅសង្កាត់ណាម្នាក់យកកម្រៃសេវាដែលខុសពីគោលការណ៏ដែលច្បាប់បានចែងគឺត្រូវតែទទួលខុសត្រូវចំពោះមុខច្បាប់៕