ឯកឧត្តម បណ្ឌិត ច័ន្ទ សារុន បានថ្លែងប្រាប់ដល់ក្រុមសិក្ខាកាម និងគ្រូបង្គោល ត្រូវបង្រៀនពីផ្នែក ព័ត៌មានវិទ្យាទៅដល់កសិករ និងសេវាករ

      ឯកឧត្តម បណ្ឌិត ច័ន្ទ សារុន បានថ្លែងប្រាប់ដល់ក្រុមសិក្ខាកាម និងគ្រូបង្គោល ត្រូវបង្រៀនពីផ្នែក ព័ត៌មានវិទ្យាទៅដល់កសិករ និងសេវាករឲ្យបានយល់ច្បាស់ ដើម្បីភាពរីកចម្រើន និងដើរទាន់សម័យការ បច្ចេកវិទ្យាបច្ចុប្បន្ន ។

                មានប្រសាសន៍បិទវគ្គបណ្ដុះបណ្ដាលផ្នែកបច្ចេកវិទ្យាព័ត៌មាន ជូនសមាជិក សមាជិកា គណៈ​កម្មា​ធិ​ការខេត្តជំរុញចលនា ភូមិ០១ផលិតផល០១ក្រោមការបណ្ដុះបណ្ដាលដោយលោក​គ្រូអ្នក​គ្រូស្មគ្រ​ចិត្ត​ជន​ជាតិកូរ៉េ០៤រូប ដល់សិក្ខាកាមជាង៤០នាក់ ដែលមានរយះពេល ០៦សប្ដាហ៍ រសៀលថ្ងៃទី ១៥ ខែសីហា ឆ្នាំ២០១៦ ឯកឧត្តម បណ្ឌិត ច័ន្ទ សារុន ទេសរដ្ឋមន្រ្តីទទួលបន្ទុក បេសកម្មពិសេស និង​ជា​អនុ​ប្រធា​ន​ក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានថ្លែងការ គោលការណ៍នៃបច្ចេកវិទ្យាព័ត៌​មាន ពិតជាមានសារៈសំខាន់ណាស់សម្រាប់កសិករបច្ចុប្បន្ន ដែលត្រូវតែស្វែងយល់ឲ្យបានច្បាស់ ហើយក្នុងនោះ យើងក៍មានផែនការដោយអ្នកចេះច្រើនបង្រៀនអ្នកចេះតិច ហើយអ្នកចេះតិចបង្រៀនអ្នក មិនចេះសោះ ដោយផ្តោតសំខាន់គឺទៅលើកសិករតែម្តង។

          ឯកឧត្តម បណ្ឌិត ច័ន្ទ សារុន បន្ថែមទៀតថា បើកាលណាកសិករចេះច្រើនពីបច្ចេកវិទ្យាព័ត៌មាន នេះកាន់តែច្រើន នោះវិស័យកសិកម្មតាមរយៈភូមិ១ផលិតផល១ នឹងត្រូវបានផ្សព្វផ្សាយទូលំទូលាយ និងស្គាល់ពីសំណាក់អាជីវករ ពាណិជ្ជករ និងធ្វើឲ្យគាត់កាន់តែមានទំនុកចិត្តលើផលិតផលរបស់ខ្លួន ជាមួយនឹងការផ្សព្វផ្សាយតាមប្រព័ន្ធ Online ហើយប្រាក់ចំណូលប្រចាំគ្រួសារនឹងកើនឡើងជាលំដាប់ ។

          ឯកឧត្តម ទេសរដ្ឋមន្រ្តី ច័ន្ទ សារុន ក៍បានជម្រុញផងដែរ ទៅដល់ដំណើរការភូមិ១ ផលិតផល១ ឲ្យបានល្អ ជាមួយនឹងកសិករលើផលិតផលរបស់ខ្លួនឲ្យមានសន្ទុះកើនឡើង តាមរយៈការផ្សព្វផ្សាយ​ជាមួយ​នឹងប្រព័ន្ធព័ត៌មានវិទ្យានេះ ហើយអ្វីដែលសំខាន់ គឺគ្រូបង្គោល ត្រូវជួយបង្រៀនបន្ថែមដល់កសិករ របស់យើង នូវប្រព័ន្ធព័ត៌មានវិទ្យា និងការលក់តាម Online នេះ ដើម្បីទទួលបាននូវលទ្ធផលល្អប្រសើរ៕