អាជ្ញាធរខេត្តតាកែវអំពាវនាវឲ្យមន្រ្តីពាក់ព័ន្ធ និងប្រជាពលរដ្ឋចូលរួមទប់ស្កាត់ការជិះជាន់ពលកម្ម កុមារនិងការជួញដូកុមារ

ខណៈពេលដែលការជិះជាន់ពលកម្មកុមារ ការប្រើអំពើហិង្សាលើកុមារជាពិសេសបញ្ហាការជួញដូរផ្លូវភេទលើកុមារ នៅតែតែបន្តកើតមាននោះ អាជ្ញាធរខេត្តតាកែវបានធ្វើការអំពាវនាវឲ្យមន្រ្តីពាក់ព័ន្ធទាំងអស់ព្រមទាំងប្រជាពលរដ្ឋផងដែរ ត្រូវធ្វើយ៉ាងណាចូលរួមទប់ស្កាត់បញ្ហាខាងលើកុំអោយរីករាលដាលតទៅទៀត។ ថ្លែងនៅក្នុងពិធីប្រារព្ធខួបទិវាកុមារអន្តរជាតិ១ មិថុនា នៅព្រឹកថ្ងៃ ពុធ ទី ១៥ ខែ មិថុនា ឆ្នាំ ២០១៦ នៅខេត្តតាកែវ លោកស្រី នូ សុវណ្ណនី អភិបាលរងខេត្តតាកែវ បានលើកឡើងពីការយកចិត្តទុកដាក់ ចំពោះកុមារពីសំណាក់រាជរដ្ឋាភិបាលកម្ពុជា ដោយក្នុងនោះរាជរដ្ឋាភិបាលបានបញ្ជូល ការងារកុមារនៅក្នុងឯកសារយុទ្ធ សាស្រ្តជាតិដូចជាគោល នយោបាយជាតិស្ដីពីការគាំពារអភិវឌ្ឍន៏កុមារ គោលនយោបាយថែទាំ គោលការណ៏ការពារសិទ្ធិកុមារ រងគ្រោះដោយសារការជួញដូរនិងសិទ្ធិចូលរួមរបស់កុមារជាដើម។

ក៏ប៉ុន្តែបើទោះបីជារាជរដ្ឋាភិបាល បានយកចិត្តទុកដាក់និងទប់ស្កាត់ការកេងប្រវ័ញ្ញលើកុមារ យ៉ាងណាក៏ ដោយ ក៏នៅតែមានជនខិលខូចមួយចំនួន បានបន្តការជិះជាន់លើពលកម្មកុមារ ការប្រើអំពើហឹង្សាជាពិសេសការជួញដូរផ្លូវភេទកុមារជាដើម។ នៅក្នុងឱកាស់នោះលោកជំទាវអភិបាលរងខេត្ត តំណាងអោយអាជ្ញាធរខេត្តតាកែវបានធ្វើការអំពាវនាវ ឲ្យស្ថាប័នពាក់ព័ន្ធរួមនិងប្រជាពលរដ្ឋផងដែរ ត្រូវធ្វើយ៉ាងណាចូលរួមទប់ស្កាត់រាល់បញ្ហាដែលកើតឡើងចំពោះកុមារ សំដៅធ្វើយ៉ាងណាអោយស្ថានភាពកុមារ នៅក្នុងខេត្តតាកែវកាន់តែមានភាពល្អប្រសើរឡើង ពិសេសគឺត្រូវទប់ស្កាត់ចំពោះអំពើជួញដូរមនុស្ស និងកុមារ តាមគ្រប់រូបភាព ដែលវានឹងធ្វើឲ្យប៉ះពាល់ដ៍ធ្ងន់ធ្ងរដល់សង្គម និងគ្រួសារ ។

លោកស្រី នូ សុវណ្ណនី ក៍បានផ្តាំផ្ញើដល់ក្មួយៗត្រូវតែខិតខំ ប្រឹងប្រែងរៀនសូត្រឲ្យបានពូកែ ព្រោះក្មួយៗជាទំពាងស្នងឬស្សី ទំពាងដែលត្រូវការលូតលាស់ល្អ ដូច្នោះក្មួយៗត្រូវធ្វើខ្លួនឲ្យមានចំណេះដឹងជ្រៅជ្រះតាមរយៈការសិក្សារៀនសូត្រ ហើយក៍ត្រូវធ្វើខ្លួនឲ្យក្លាយជាមនុស្សដ៍ចាំបាច់នៅក្នុងសង្គម ដោយមិនត្រូវប្រព្រឹត្តអំពើអបាយ មុខផ្សេងៗឡើយត្រូវប្រព្រឹត្តតែអំពើល្អ និងមានសីលធម៌ សុជីវធម៌ ពិសេសត្រូវក្លាយជា កូនល្អ សិស្សល្អ មិត្តល្អ ៕