កាំកុងត្រួលខេត្ត សហការជាមួយមន្ទីរពាជ្ជណិកម្មខេត្ត បានចុះត្រួតពិនិត្យទំនិញជាប្រភេទសាច់ បន្លែ គ្រឿង កំប៉ុង នំកញ្ចប់

ដើម្បីចូលរួមលើកកម្ពស់សុខមាលភាពសាធារណៈ ក៏ដូចជាធានានូវសុវត្ថិភាពចំណីអាហារនៅលើទីផ្សារ ព្រឹកថ្ងៃទី ២១ មិថុនា ២០១៦ មន្រ្តីជំនាញកាំកុងត្រួល ដឹកនាំដោយ លោក ប៉ោ លាងគង់ ប្រធានសាខា កាំកុងត្រួលខេត្ត សហការជាមួយមន្ទីរពាជ្ជណិកម្មខេត្ត បានចុះត្រួតពិនិត្យទំនិញជាប្រភេទសាច់ បន្លែ គ្រឿង កំប៉ុង នំកញ្ចប់ នៅក្នុងផ្សារត្រាំកក់ ផ្សារតាកែវ និងអាគារលក់ដូរជុំវិញផ្សារ

លោក ប៉ោ លាងគង់ ប្រធានសាខាកាំកុងត្រួលខេត្ត បានអោយដឹងថា ក្នុងប្រតិបត្តការណ៏លើកនេះ គឺ ដើម្បីអប់រំណែនាំ ដល់អាជីវករពីសុវត្ថិភាពម្ហូបអាហារ នឹងអោយគាត់ចេះគិតគូរពីផលប៉ះពាល់សុខភាពដល់ អ្នក ប្រើប្រាស់ ពិសេសត្រូវចេះទទួលខុសត្រូវចំពោះមុខច្បាប់លើទំនិញដែលគាត់ដាក់លក់លើទីផ្សារ ។

បើតាមការឲ្យដឹងពីលោក ប៉ោ លាងគង់ គោលបំណងនៃការចុះត្រួតពិនិត្យទំនិញនេះ គឺផ្តោតសំខាន់ លើទំនិញ ដែលមានសារធាតុគីមី ទំនិញហួសកាលបរិច្ឆេទប្រើប្រាស់ គ្មានប្រភពច្បាស់លាស់ ហើយក្នុងប្រតិបិត្ត ការណ៍នេះ គឺយើង ធ្វើតេស្តបឋមទៅលើបន្លែ ប្រហុក ប្រហិតសាច់គោ ជាលទ្ធផលគឺយើងពុំឃើញមានសារ ធាតុគីមីដែលត្រូវហាមឃាត់នោះឡើយ ។

ជាមួយគ្នានេះដែរ លោក ប៉ោ លាងគង់ ក៍បានធ្វើការអំពាវនាវបាន ដល់អាជីវករទាំងអស់ត្រួវយល់ ដឹង អំពីសុវត្ថិភាពចំណី អាហារ ដែលយកទៅប្រើប្រាស់ ឬបរិភោគ ត្រូវពិនិត្យឲ្យបានច្បាស់លាស់អំពីផលិត ផលម្ហូប អាហារ និង ការដាក់តាំងលក់នូវទំនិញ ដែលគ្មានផ្ទុកសារជាតិគីមី និងពិនិត្យមើលពីការកាលបរិច្ឆេទ នៃការប្រើប្រាស់ឲ្យបានត្រឹមត្រូវ ដើម្បីថែរក្សាសុខភាពប្រជាពលរដ្ឋ និងសុខមាលភាពសាធារណៈ ៕