កោះរ៉ុងកោះឋានសួគ៌ខ្មែរ ទៅលេងប៉ុន្មានដងក៏មិនជិនណាយ
«ទូកលឿនមិនជិះមកជិះទូកយឺតយ៉ាប់ណាស់ពួកហ្អែងនេះ ក្តៅចង់ងាប់ហើយ តម្លៃខុសគ្នាតា ៥ដុល្លារសោះហ្នឹង»។
នេះជាសម្ដីមិត្តភ័ក្ដិមហាសែនពូកែរអ៊ូរបស់ខ្ញុំម្នាក់និយាយ ខណៈកំពុងតែជិះទូកយឺតបើកគើមៗ ឃ្លីងឃ្លោងកណ្ដាលសមុទ្រជាមួយមិត្តភ័ក្ដិ ២នាក់ទៀត។ ទឹករលកកណ្ដាលមហាសាគរធំល្វឹងល្វើយបោកប៉ះទូកឃ្លីងឃ្លោងធ្វើឱ្យ ខ្ញុំវិលមុខស្ទើរចង់ចាក់បាញ់ឆែវ តែដោយបំណងចង់ទៅលេងកោះដែលល្បីថាស្អាតដាច់គេក្នុងស្រុកខ្មែរ ទើបចេះតែទ្រាំ។
ជាង២ម៉ោងកន្លះទើបទូកយឺតដែលដាក់មនុស្សរាប់សិបនាក់នោះទៅដល់ កោះរុងនៅម៉ោងប្រហែល ១រសៀល ព្រោះទូកភាគច្រើនចេញម៉ោង ៩, ១០ ឬ ១១ព្រឹក។ យូរនេះដោយសារទូកបើកយឺតៗព្រោះរលកធំៗពេក។ កោះពិតជាស្អាត ស្អាតដូចដែលគេនិយាយមែន ធ្វើឱ្យអារម្មណ៍ខ្ញុំដែលរកកល់ចង់ក្អួតនោះបាត់អស់រលីង រីឯមិត្តភ័ក្ដិដែលតែងតែរអ៊ូតាមទូកនោះក៏ស្រស់ស្រាយ ព្រោះគេក៏មិនដែលមកកោះរុងនេះដែរ។
ព្រោះតែទឹកសមុទ្រខៀវថ្លា ខ្សាច់សមុទ្រសក្បុស រួមទាំងព្រៃឈើខៀវស្រងាត់ អារម្មណ៍ធុញថប់យ៉ាងណាក៏បាត់អស់ដែរ។
ពេលទៅដល់កំពង់ផែចុះទូក ខ្ញុំនិងមិត្តភ័ក្ដិ៣នាក់ទៀតនាំគ្នាដើររកផ្ទះសំណាក់តម្លៃថោកៗ ពី ១៥ទៅ ២០ដុល្លារមួយយប់ តែចំពោះអ្នកវិញបើចង់គេងផ្ទះបឹកកាឡូទាល់តែចំណាយពី ៦០ទៅ ៨០ដុល្លារមួយយប់។ បើចង់អស់តិចជាងនេះជួលតង់ដេកនិងដាក់អ៊ីវ៉ាន់នៅឆ្នេរសមុទ្រក៏ ម្យ៉ាងហើយអស់តិចទៀត។
សូមស្លេះនិយាយពីគ្នាខ្ញុំនិងមិត្តភ័ក្ដិបន្តិច មកនិយាយបទពិសោធន៍លើកោះវិញ។
**ពេលថ្ងៃ៖
បើនិយាយរឿងម្ហូបមិនខ្វះទេលើកោះរុង គ្រាន់តែភាគច្រើនជាម្ហូបបរទេស តែបើអ្នកចង់ចំណាយតិចហើយញាំបានច្រើននិងឆ្ងាញ់ គួរទិញសាច់និងគ្រឿងសមុទ្រស្រស់ៗឬចម្អិនឱ្យហើយពីផ្សារលើកំពុង សោមទុកឱ្យញាំលើកោះ។ បើអ្នកទៅដល់កោះរុងខ្ទង់ម៉ោងប្រហែល ១ឬ ២រសៀល អាចរុះរាន់រកកន្លែងស្នាក់នៅ ញាំអាហារ ថតរូបដោយមានទេសភាពនៅពីក្រោយស្រស់ស្អាតបែបធម្មជាតិ និងងូតទឹកសមុទ្រថ្លាដូចកញ្ចក់យ៉ាងរីករាយ។
ភាគច្រើនអ្នកទៅលេងកោះរុងមិនថាលក្ខណៈមិត្តភ័ក្ដិ គ្រួសារ និងគូស្នេហ៍ ច្រើនតែក្រាលកន្ទេលលើខ្សាច់ឬលើថ្មញាំអាហារក្រោមដើមឈើត្រជាក់ អមដោយសំឡេងទឹកសមុទ្របោកច្រាំងប្រ៉ាវៗ ហើយបើមានចម្រៀងប្រគំក្បែរទៀតរឹតតែអណ្ដែតអណ្ដូង។
បកមកគ្នាខ្ញុំទាំង ៤នាក់វិញក្រោយរកកន្លែងកន្លែងគេងបានហើយក៏នាំគ្នាញាំអាហារ ហើយក៏អង្គុយមួយសន្ទុះរាងស្រកពោះបន្តិចក៏មុជទឹកដេញធាក់គ្នា លេង។ ពេលកំពុងមុជទឹកលេងខ្ញុំបានធាក់មិត្តភ័ក្ដិពូកែរអ៊ូជាងគេចំ ចង្កេះលេងមួយជើងរាងខ្លាំងដែរ ហើយគេក៏ដេញធាក់ខ្ញុំវិញ រត់បះជើងសព្រាត។
ទៅដល់កោះរុងហើយ គួរដើរត្រាច់ចរតាមឆ្នេរសមុទ្រឱ្យបានយូរបន្តិចក្រោយពេលញាំអាហារ មានកម្លាំង ដើម្បីឃើញដើមឈើខ្ពស់ៗ ខ្យល់បរិសុទ្ធបក់បោកដើមឈើប្រ៉ាវៗ កូនត្រីសមុទ្រហែលរកចំណីក្បែរកន្លៀតថ្ម ដែលជាបទពិសោធន៍មួយអ្នកពិបាករកនៅកន្លែងផ្សេង។
**ពេលយប់៖
ដើរមួយថ្ងៃហើយប្រហែលជាអស់កម្លាំង។ កុំទាន់! នៅមានរឿងសប្បាយអ្នកត្រូវធ្វើទៀត!ចូលដល់ម៉ោងប្រហែល ៥:៣០ ទៅ ម៉ោង ៦:០០ល្ងាច ផ្ទៃមេឃនឹងឡើងពណ៌ខៀវ ជាពេលល្អសម្រាប់ថតរូប។ ម្យ៉ាងទៀតអ្នកគួរកុំទាន់ញាំអាហារអី គួរដើរមើលទិដ្ឋភាពហាងក្បែរសមុទ្រនិងResort ស្អាតៗពេលរាត្រី ហើយក៏អាចថតរូបបានទៀត។
អ្នកអាចចំណាយពេលដើរលេងប្រហែល១ម៉ោងឬពីរម៉ោង សឹមមកញាំអាហារ ព្រោះកាលណាឃ្លានទើបញាំឆ្ងាញ់។ មានជម្រើសពីរអ្នកគួរធ្វើពេលយប់នៅកោះរ៉ុងក្រោយញាំអាហាររួច៖
ទី១៖ បើជាគូស្នេហ៍អាចបណ្ដើរគ្នាថតរូប ឬសាសងគ្នានៅតាមឆ្នេរសមុទ្របែបរ៉ូមែនទិក ឬមិនអ៊ីចឹងអាចអង្គុយមាត់ឆ្នេរស្តាប់សំឡេងទឹកសមុទ្រ ស្រូបខ្យល់អាកាសបរិសុទ្ធ មើលព្រះចន្ទរះលើមេឃអមដោយផ្កាយភ្លឺចិញ្ចែងចិញ្ចាចលើមេឃ។ បើជា ក្រុមឬគ្រួសារ អាចចាក់បាសរាំលេងនិងអាំងសាច់ញាំលើឆ្នេរ។
ទី២៖ ទៅមើល Plankton ពេលយប់
អ្នកចំណាយត្រឹមតែ ៥ដុល្លារដើម្បីទៅមើល Plankton ក្នុងទឹកពេលយប់។ Plankton ពិបាកនឹងបញ្ជាក់ថាជាស្អីឱ្យប្រាកដ គ្រាន់តែតាមបទពិសោធន៍ខ្ញុំផ្ទាល់ គិតថាវាដូចជាសារធាតុម្យ៉ាងក្នុងទឹកហើយបញ្ចេញពន្លឺភ្លឺដូចស ចិញ្ចាចពេលយប់។ ពេលអ្នកនៅលើទូកគ្រាន់តែយកដៃវាសទឹកនោះនឹងឃើញ ពន្លឺគ្រាប់ៗចិញ្ចាចដូចគ្រាប់ពេជ្រ នោះហើយជា Plankton។ រឹតតែស្អាតពេលអ្នកលោតមុជទឹកនោះ Plankton នឹងជាប់ពេញខ្លួនប្រាណអ្នកយ៉ាងស្រស់ស្អាត។ បើអ្នកទៅមើល Plankton ពេលយប់ជាក្រុមមានគ្នាច្រើន ធានាថាសប្បាយ។
ពេលនេះប្រហែលអស់កម្លាំងហើយ អ៊ីចឹងទៅគេង ទុកកម្លាំងដើរលេងកោះពេលព្រឹកទៀត។
**មើលថ្ងៃរះពេលព្រឹក
Angkor Post សរសេរទុកពេលព្រឹកក្រោយគេគឺដោយសារថ្ងៃដំបូងអ្នកមកដល់កោះរុងគឺពេលរសៀលហើយ។
អ្នកគួរក្រោកពីព្រឹកមុនម៉ោង ៦ ដើម្បីទៅមើលថ្ងៃរះចំពីមុខកោះរុង។ ម្យ៉ាងទៀតខ្យល់អាកាសបរិសុទ្ធពេលព្រឹកនៅកោះរុងពិតជាធ្វើឱ្យអ្នក ស្រស់ស្រាយខ្លាំងជាពេលណាៗទាំងអស់។ ពេលនេះអ្នកក៏អាចដើរលេងតាមឆ្នេរសមុទ្របានយ៉ាងរីករាយដែរ។
ពេលព្រឹកជាពេលវេលាដើរលេងលើកោះដ៏ល្អបំផុតព្រោះអាកាសធាតុ ត្រជាក់ហើយខ្យល់បរិសុទ្ធថែមទៀត ហើយបើអ្នកគិតថាចង់ស្ទូចត្រឹលេងរឹតតែសប្បាយថែមទៀត។ បើអ្នកនៅគេងច្រើនថ្ងៃគួរចំណាយពេលទៅលេងឆ្នេរកោះរ៉ុងសន្លឹម ដែលល្បីថាស្អាតជាងឆ្នេរឆ្នេរកោះរ៉ុងរាប់ដងឯណោះ។ នៅមានកន្លែងជាច្រើនទៀតនៅកោះរ៉ុងដូចជា តំបន់ទឹកធ្លាក់ និងកន្លែងជិះខ្សែរ៉កលើដើមឈើជាដើម។
“ឮគេនិយាយមួយរយដង មិនស្មើនឹងឃើញផ្ទាល់ភ្នែកមួយដងឡើយ”។
រូបភាពបន្ថែមពិសេសៗជូនអ្នកទស្សនា៖
No comments: